फ्लोरिडा (एजेन्सी) । मानव इतिहासमा अर्को एउटा महत्त्वपूर्ण अध्याय थपिएको छ। अमेरिकी अन्तरिक्ष एजेन्सी नासाले झण्डै साढे पाँच दशकपछि पुनः मानवलाई चन्द्रमाको नजिक पठाउने उद्देश्यका साथ ‘आर्टेमिस–२’ अभियानको सफलतापूर्वक प्रक्षेपण गरेको छ।
फ्लोरिडास्थित केनेडी स्पेस सेन्टरबाट स्थानीय समय अनुसार बुधबार साँझ (नेपाली समय अनुसार बिहीबार बिहान साढे ४ बजे) अत्याधुनिक ‘ओरिअन क्याप्सुल’ अन्तरिक्षतर्फ प्रस्थान गरेको हो। यस ऐतिहासिक यात्रामा चारजना अन्तरिक्ष यात्रीहरू रीड वाइजम्यान, भिक्टर ग्लोभर, क्रिस्टिना कोच र क्यानेडियन यात्री जेरेमी ह्यान्सन सहभागी छन्। यो मिसन सफल भएमा जेरेमी चन्द्रमाको कक्षसम्म पुग्ने पहिलो क्यानेडियन नागरिक बन्नेछन्।
कुल १० दिनको यो यात्रा निकै सावधानीपूर्वक तय गरिएको छ। सुरुको २४ घण्टासम्म ओरिअन यान पृथ्वीकै तल्लो कक्षमा रहनेछ, जहाँ वैज्ञानिकहरूले यानको अवस्था र चन्द्रमातर्फको मार्गको सूक्ष्म अध्ययन गर्नेछन्। सबै प्रणाली सुरक्षित देखिएपछि मात्र ‘ट्रान्स-लुनार इन्जेक्सन’ प्रक्रियामार्फत शक्तिशाली इन्जिन प्रज्वलन गरी यानलाई तीव्र गतिमा चन्द्रमातर्फ धकेलिनेछ।
नासाका अनुसार सबै अन्तरिक्ष यात्रीहरू सुरक्षित र उच्च मनोबलका साथ आफ्नो यात्रामा अगाडि बढिरहेका छन्। सन् १९७२ पछि मानव जाति पुनः चन्द्रमाको यति नजिक पुग्न लागेको यो पहिलो पटक हो, जसलाई विश्वभरकै वैज्ञानिक समुदायले निकै चासोका साथ हेरिरहेको छ।