काठमाडौं । सानिमा बैंक लिमिटेडको वितरणयोग्य नाफा उल्लेख्य रूपमा बढेको छ । बैंकले सार्वजनिक गरेको गत आर्थिक वर्षको चौथो त्रैमासिक वित्तीय विवरणअनुसार बैंकको वितरणयोग्य नाफा २ अर्ब ८३ करोड रुपैयाँभन्दा बढी पुगेको छ ।
अघिल्लो आर्थिक वर्षको सोही अवधिमा बैंकको वितरणयोग्य नाफा २ अर्ब १० करोड रुपैयाँभन्दा बढी थियो । समीक्षा अवधिमा बैंकको वितरणयोग्य नाफा ३४ दशमलव ६६ प्रतिशतले वृद्धि भएको हो ।
बैंकको खुद नाफामा समेत उल्लेख्य सुधार देखिएको छ । अघिल्लो आर्थिक वर्षको चौथो त्रैमाससम्म २ अर्ब ५७ करोड रुपैयाँभन्दा बढी खुद नाफा गरेको बैंकले गत आर्थिक वर्षको सोही अवधिमा ३ अर्ब ५५ करोड रुपैयाँभन्दा बढी खुद नाफा आर्जन गरेको छ । यो अघिल्लो वर्षको तुलनामा ३८ प्रतिशतको वृद्धि हो ।
बैंकको खराब कर्जा व्यवस्थापनमा समेत सुधार आएको छ । गत वर्ष इम्पेरमेन्ट चार्ज घटेको छ । अघिल्लो वर्ष १ अर्ब ८८ करोड रुपैयाँभन्दा बढी रहेको इम्पेरमेन्ट चार्ज गत वर्ष घटेर १ अर्ब ७ करोड रुपैयाँभन्दा बढी कायम भएको छ ।
त्यस्तै, बैंकको सञ्चालन नाफा पनि वृद्धि भएको छ । अघिल्लो वर्षको तुलनामा गत वर्ष सञ्चालन नाफा ४४ दशमलव ४४ प्रतिशतले बढेको बैंकले जनाएको छ । हाल सानिमा बैंकको चुक्तापुँजी १५ अर्ब ५८ करोड १५ लाख २५ हजार रुपैयाँ रहेको छ भने जगेडा कोषमा ९ अर्ब १२ करोड रुपैयाँभन्दा बढी रकम रहेको छ ।
चौथो त्रैमाससम्म बैंकले २ खर्ब ४९ अर्ब ११ करोड रुपैयाँभन्दा बढी निक्षेप संकलन गरेको छ । सो अवधिमा बैंकले १ खर्ब ९५ अर्ब ८८ करोड रुपैयाँभन्दा बढी कर्जा प्रवाह गरेको छ ।
बैंकको निष्क्रिय कर्जा (एनपीएल) समेत घटेको छ । अघिल्लो वर्ष ३ दशमलव ०१ प्रतिशत रहेको निष्क्रिय कर्जा गत वर्ष घटेर २ दशमलव ८७ प्रतिशतमा सीमित भएको छ । समीक्षा अवधिमा बैंकको प्रतिशेयर आम्दानी (ईपीएस) २५ रुपैयाँ ७५ पैसा रहेको छ भने प्रतिशेयर नेटवर्थ १८८ रुपैयाँ ४२ पैसा कायम भएको छ ।